„ახალგაზრდა ადვოკატები“: პროკურატურამ სწრაფი გამოძიებით უნდა დაადგინოს, ექსპერტიზის ეროვნულ ბიუროში, პირადი ინტერესებით, გაყალბდა, თუ არა დასკვნები.
ორგანიზაცია საქართველოს გენპროკურატურას, მიმართავს, დაუყოვნებლივ მოხდეს სამხარაულის სახელობის, სასამართლო ექსპერტიზის ეროვნულ ბიუროში ორი საექსპერტო დასკვნის, შესაძლო გაყალბების ფაქტის შესწავლა, სახელმწიფოსთვის მიყენებული ზიანის პასუხისმგებელი სუბიექტების გამოკვეთა და საზოგადოების ინფორმირება, მიმდინარე საგამოძიებო მოქმედებების პროცესზე.
აღნიშნულის შესახებ, მიმდინარე წლის აგვისტოს დასაწყისში, სპეციალურ ბრიფინგზე განაცხადეს, „ახალგაზრდა ადვოკატების ხელმძღვანელმა არჩილ კაიკაციშვილმა და სისხლის სამართლის ადვოკატმა ნიკა სადრაძემ. საქმე ეხება ზემოხსენებული ბიუროს ქიმიურ-ნარკოლოგიური ექსპერტიზის დეპარტამენტში, 2024 წელს მომზადებულ ორ დასკვნას და განვითარებულ მოვლენებს.
პირველი შემთხვევა შეეხება, გარემოს დაცვისა და სოფლის მეურნეობის სამინისტროს მიერ დანიშნულ ექსპერტიზას, რა დროსაც, ინდმეწარმის პროდუქციაზე, უარყოფითი დასკვნა გაიცა, რომლის საფუძველზეც, ინდმეწარმე 114 ათასი ლარის ოდენობით დაჯარიმდა. რეალური ფაქტების მიუხედავად, ნავთობპროდუქტების ექსპერტიზის სამმართველოს უფროსის მიერ, ხელსაწყოზე ზემოქმედების შედეგად, ხელახლა მომზადებული იქნა ინდმეწარმის სასარგებლოდ, ახალი დასკვნა, რის გამოც, სახელმწიფო ბიუჯეტმა 114.000 ლარით იზარალა.
მეორე შემთხვევა შეეხება, შპს „საქართველოს რკინიგზის“ მიერ დანიშნულ ექსპერტიზას საცხზე, რა დროსაც, დაწუნებული იქნა, კომპანიის მიერ წარმოდგენილი საცხი, მაგრამ ამ შემთხვევაშიც, ბიუროს ნავთობპროდუქტების ექსპერტიზის სამმართველოს უფროსის მიერ, გაცემული იქნა ახალი დასკვნა, საცხის ვარგისიანობის თაობაზე, რასაც შეიძლება მოჰყვეს სავალალო შედეგი, რაც პირდაპირ დაკავშირებულია, მოქალაქეების გადაადგილების უსაფრთხოებასთან.
ორგანიზაცია „ახალგაზრდა ადვოკატები“ აღნიშნავს, რომ მას შემდეგ, რაც ბიუროში დაინიშნა ექსპერტიზა საცხზე(ლზ-ნიი), საცხის კასრებიდან, კერძოდ, ადგილზე არსებული საცხის ოთხი პარტიის, 4-4 კასრიდან აღებული იქნა ნიმუშები სტანდარტის (გოსტ 2517-2012) დაცვით, თითოეული პარტიიდან კასრების გახსნისას, სინჯის ამღები შუპით ამოღებისას აღმოჩნდა, რომ მათში მოთავსებული იყო, არაერთგვაროვანი შეფერილობის მქონე საცხი. კერძოდ, უმეტესობა კასრის ზედა ნახევარში შეინიშნებოდა მოყვითალო ფერის, ხოლო ქვედა ნახევარში, მოვარდისფრო ელფერის საცხის არსებობა. სინჯის აღების მომენტში, საცხი ჰაერთან ურთიერთქმედებისას, ფერს იცვლიდა და იღებდა მუქ მოყვითალო და ღია მოყავისფრო შეფერილობას, რაც შემდგომში ლაბორატორიულადაც დადასტურდა.
საცხზე მოქმედი სტანდარტის მიხედვით, „ნიმუში უნდა იყოს ერთგვაროვანი საცხი, კოშტების გარეშე, ღია მოყვითალოდან. მუქ მოყვითალომდე“. სასაგნე მინაზე შეფასდა მისი გარეგანი სახე, რომელიც იყო მუქი მოყვითალო-ღია მოყავისფრო. ზოგადად, ფერი წარმოადგენს ძალზე სუბიექტურ მაჩვენებელს. შესაბამისად, ფერით დაწუნება, შესაძლოა, სადაო გახდეს. ზოგიერთი ჩათვლის, რომ არის მუქი მოყვითალო, ზოგი – ღია მოყავისფროდ, მაგრამ საცხის დაწუნება მოხდა არა მისი სასაგნე მინაზე ფერით, არამედ საცხის არაერთგვაროვანი ფერითა და მისი არასტაბილურობით.
არსებული ფაქტების მიუხედავად, ქიმიურ-ნარკოლოგიური ექსპერტიზის დეპარტამენტის ხელმძღვანელმა პირებმა გადაწყვიტეს, რომ საცხზე დანიშნულიყო კომისიური ექსპერტიზა, ხოლო ამ ექსპერტიზის დროს, აპრიორში, არ გაზიარებულიყო დასკვნის ავტორი ექსპერტის მოსაზრებები. კომისიურ ექსპერტიზაზე შეთანხმდნენ, რომ საცხი აკმაყოფილებდა სტანდარტის მოთხოვნებს, მაგრამ სინჯის აღების აქტში, არ დააფიქსირეს ფაქტი იმის შესახებ, რომ საცხს ამოღებისას, მოვარდისფრო შეფერილობა ჰქონდა კასრების ქვედა ნახევარში.
„ახალგაზრდა ადვოკატები“ აღნიშნავს, ის ფაქტი, რომ საცხი უვარგისია, ადასტურებს ექსპერტის თავდაპირველად დეტალურად შესწავლილი მასალის შედეგად, წვეთვარდნის პარამეტრები, რაც საცხის დადნობის და წვეთად ქცევის მომენტს ადგენს. ამ შემთხვევაში, დასაშვები ნორმა უნდა იყოს არანაკლებ 135 გრადუსი, რაც ამ შემთხვევაში 122 გრადუსია, ანუ მაჩვენებელი დაბალია. რაც ნიშნავს, რომ წარმოდგენილი საცხი, დროზე ადრე დადნება, ჩამოიღვენთება, ხახუნის შედეგად რკინის დეტალები – ბორბლების საკისურები გადახურდება, გატყდება და გამოიწვევს ვაგონების შესაძლო გადატრიალებას. ორგანიცაცია აღნიშნავს, რომ შეცვლილ დასკვნაში, რომ წვეთვარდნის მონაცემი, მაღალი ალბათობით, გაყალბდა, რადგან მითითებული იქნა 145 გრადუსი.
„ახალგაზრდა ადვოკატები“, საგანგაშოს უწოდებს მეორე დასკვნასთან დაკავშირებულ მოვლენებს, კერძოდ, საქართველოს გარემოს დაცვისა და სოფლის მეურნეობის სამინისტროს მიერ დანიშნულ ექსპერტიზას, რა დროსაც, ინდმეწარმის პროდუქციაზე ჯერ უარყოფითი დასკვნა გაიცა, შემდეგ კი სასურველი დასკვნა. ეს უკანასკნელი გამოწვეული იქნა, ნავთობპროდუქტების ექსპერტიზის სამმართველოს უფროსის მიერ, ხელსაწყოზე ზემოქმედების შედეგად. აღმოჩნდა, რომ ეროვნული ბიუროს ხსენებული სამმართველო უფროსმა, რომელმაც ხელახლა ჩაატარა ნიმუშის შემოწმება იმ განზრახვით, რომ პირველი დასკვნის უარყოფა მოეხდინა. აღნიშნული შედეგი მიიღო, ხელსაწყოს მონაცემებზე ხელოვნური ზემოქმედებით, კერძოდ, შეცვალა ხელსაწყოს ადსორბციული სვეტი და გააგრძელა მასზე მუშაობა, ისე, რომ არ დაუკალიბრებია ხელსაწყო, რაც დაუშვებელია. ხელსაწყოს ინსტრუქციის მიხედვით, სავალდებულოა, რომ, როდესაც დღის ფაქტორი სცდება 0.9-1.1 დიაპაზონს, ადსორბციული სვეტის შეცვლის შემდეგ, ხელსაწყო უნდა დაკალიბრდეს, რაც არ განხორციელებულა. შესაბამისად, ხელოვნური ჩარევის შედეგად, დაჯარიმებულმა მეწარმემ მიიღო ახალი, სასარგებლო დასკვნა, ხოლო იკვეთება, რომ სახელმწიფო ბიუჯეტმა იზარალა 114.000 ლარი.
„ახალგაზრდა ადვოკატები“ აღნიშნავს, რომ ექსპერტიზის ბიუროში დასკვნების შეცვლას, გააჩნდა მიზანმიმართული საფუძველი, რაც განპირობებული არ ყოფილა პროფესიული აზრთა სხვადასხვაობით.
(გაგრძელება იქნება)